"Сулусчаан - 2021"

Автор: Ekaterina от 25-03-2021, 11:36, посмотрело: 116

0
XXVIII төгүлүн кэтэхтэн ыытыллыбыт "Сулусчаан-2021" талааннаах оҕолор күрэхтэрэ түмүктэннэ. Үлэни кулун тутар ый 12 күнүттэн 19-гар диэри туттубут. Быйылгы күрэх кэтэхтэн ыытыллан республикабыт араас муннугуттан уопсайа 1341 оҕо кытынна. Хоту улуустартан тиийэ дьоҕурдаах оҕолор кыттыбыттара кэрэхсэбиллээх буолла. Дьүүллүүр сүбэ үс күн утумнаахтык үлэлээтэ. Бастатан туран сценичэскэй көстүүмнэрин, туттууну-хаптыыны, артыыстааһыны, дьоҥҥо тиэрдиитин көрдүлэр. Киирбит үлэлэр «Тускул» оҕо киинин инстаграм страницатыгар таҕыстылар.
Салайаачччылар, төрөппүттэр олус кыһаллан оҕолору кытыннардылар. Оҕолор толорор таһымнара үрдээбит, кэтэр таҥастара тупсан иһэрэ үөрдэр. Ордук Өлүөхүмэ улууһуттан улахан бөлөх оҕолоро тыыннаах доҕуһуолунан ыллаан-туойан дьүүллүүр сүбэ кэрэхсибилин ылла. Маны таһынан, Дьокуускай куорат № 11 «Подснежник» уонна Бүлүү куорат «Аленушка» уһуйаан иитиллээччилэрэ хоһоону уус-ураннык сахалыы хомоҕойдук аахтылар. Уус-Дьааҥы Казачье нэһилиэгин орто оскуолатын үөрэнээччилэрэ үрдүк таһымнаахтык кытыннылар. Онтон күрэхпит муҥутуур кыайыылааҕынан Үөһээ Бүлүүтээҕи Н.И. Бойлохов аатынан оҕо искусство оскуолатын иһинэн үлэлиир олоҥхо оскуолатын иитиллээччилэрэ ааттаннылар, салайааччылара Сахаайта Мойтохонова.
Хас биирдии оҕолорго «Тускул» оҕо киинин аатыттан махталбытын тиэрдэбит. Инникитин даҕаны кэрэ эйгэтигэр уһуйуллан, сайдан иһэргитигэр баҕарабыт. Төрөппүттэргитин, иитээччилэргитин уонна салайааччыларгытын ситиһиилэргитинэн үөрдэ туруҥ диэн алгыспытын аныыбыт.





Категория: Воспитательная работа / Дополнительное образование