VeRViLaNet Group

“Сыл бастыҥ учуутала” күрэх бастыҥнары ааттаата.

 Алтынньы ый 11 күнүгэр Үөһээ Бүлүүтээҕи Д.С. Спиридонов аатынан орто оскуолаҕа “Сыл бастыҥ учуутала” улуустааҕы күрэх буолан ааста. Быйылгы күрэххэ улуус 11 оскуолатыттан барыта 11 учуутал кытынна. Күрэх сонун өрүтүнэн Дьокуускай куораттан анаан ыҥырыллан кэлбит “Сыл бастыҥ учуутала” өрөспүүбүлүкэтээҕи күрэхтэр абсолютнай кыайыылаахтара Прокопий Дмитриевич Батюшкин, Дьокуускай куорат 33-с №-х орто оскуолатын историяҕа учуутала (2017 с.), Артур Гаврильевич Моисеев, Табага орто оскуолатын историяҕа учуутала (2014 с.), Роман Николаевич Оконов, ыраах Калмыкияттан Уус Алдан Суоттутугар кэлэн үлэлии сылдьар история учуутала кыттыыны ыллылар, маастар кылаастары биэрдилэр, дьүүллүүр сүбэҕэ үлэлээтилэр. Күрэх үөрүүлээх аһыллыытыгар эҕэрдэ тыллары эттилэр Үөһээ Бүлүү улууһун Баһылыгын солбуйааччы Михалев С.А., улуустааҕы үөрэх салалтатын начальнигын солбуйааччы Николаева Л.Е., Д.С. Спиридонов аатынан орто оскуола директора, “Сыл бастыҥ учуутала” республиканскай кулууп салайааччыта Кынатов Ю.В., Уус Алдан улууһун Суотту орто оскуолатын учуутала, республиканскай күрэх кыайыылааҕа, Саха сирин аатыттан 2020 сылга Бүтүн Россиятааҕы “Россия бастыҥ учуутала” күрэххэ кыттаары сылдьар Оконов Роман Николаевич.

 Улуустааҕы күрэҕи 18 киһиттэн састааптаах дьүүллүүр сүбэ сыаналааата. Бу күрэх быйыл 29-с төгүлүн ыытыллар, мантан саҕалаан кынат анньынан үлэлэринэн ааттара үрдүккэ ааттаммыт ытыктанар үлэһиттэрбит үтүө суолларынан, эдэр көлүөнэ учууталлар үрдүк таһымнаах уруоктары биэрэн, бэйэлэрин идэлэригэр бэлэмнээхтэрин көрдөрдүлэр.

 “Сыл бастыҥ учуутала” конкурс 4 номинациянан түмүктэннэ. Түмүккэ, “Учитель года-2019” улуустааҕы конкурс абсолютнай кыайыылааҕынан, Д.С .Спиридонов аатынан орто оскуола алын сүһүөҕүн учуутала Валентина Ивановна Николаева, 1 миэстэ Үөһээ Бүлүүтээҕи М.А.Алексеев лицей – интернатын нуучча тылыгар уонна литературатыгар туйгун категориялаах учуутала Борисова Александра Петровна, 2-с миэстэ Тамалакаан орто оскуолатын саха тылыгар уонна литературатыгар туйгун категориялаах учуутала Галина Васильевна Терентьева, 3-с миэстэ, П.Н.Тобуруокап аатынан Нам орто оскуолатын омук тылыгар бастыҥ категориялаах учуутала Саргылана Сергеевна Спиридонова, “Лидер учуутал” номинацияны Ороһу орто оскуолатын алын сүһүөх кылааһын учуутала Вероника Дмитриевна Борисова, “Маастар учуутал” Үөһээ Бүлүүтээҕи И.Н.Барахов аатынан орто оскуола алын сүһүөх кылаас бастыҥ категориялаах учуутала Кысылбаикоава Мария Вадимовна, “Айымньылаах учуутал” Үөһээ Бүлүүтээҕи М.Т.Егоров аатынан 2-с №-х орто сокуола алын сүһүөх кылаас туйгун категориялаах учуутала Алексеева Ульяна Васильевна, “Үөрэнээччилэр биһирэбиллэрин ылбыт учуутал” Дьүөгэ Ааныстыырап аатынан Кэнтик орто оскуолатын физикаҕа учуутала Марианна Трофимовна Миронова буоллулар. Абсолютнай кыайыылаахха Д. С. Спиридонов аатынан орто оскуола алын сүһүөҕүн учуутала Валентина Ивановна Николаеваҕа үөрэх үлэһиттэрин профсоюзтарын улуустааҕы комитета 35 тыһыынча суумалаах сертификаты, 1 миэстэҕэ 15, иккис мистэҕэ 10, үһүс миэстэҕэ 5 тыһыынча суумалаах харчынан сертификаттары улуустааҕы үөрэх салалтата туттарда. Бу профессиональнай конкурс учуутал идэтэ үтүө санаа, талаан, бэйэ дьыалатыгар бэриниилээх буолуу, оҕоҕо муҥура суох таптал буоларын өссө төгүл дакаастаата. Конкурс түмүгүнэн, абсолютнай кыайыылаах Николаева В. И., 1 миэстэлээх Борисова А. П. аны саас кулун тутар ыйга “Сыл бастыҥ учуутала” республиканскай күрэххэ кыттыахтара.

 Тэрийээччилэр да, ыалдьыттар да Үөһээ Бүлүү улууһа “Сыл бастыҥ учуутала” профессиональнай күрэх төрүттэммит дойдута диэн мээнэҕэ эппэттэр. Сыллата ыытыллар Бутун Россиятааҕы «Учитель года» конкурска улуустан 3 киһи кыттыбыта биллэр. 1996 с. Үөһээ Бүлүүтээҕи Ис. Барахов аатынан орто оскуола биологияҕа учуутала Баппагай Д. М., 2010 с. Үөһээ Бүлүүтээҕи республиканскай гимназия историяҕа, обществознаниеҕа учуутала Кынатов Ю. В., 2012 с. эмиэ бу гимназия нуучча тылын, литературатын учуутала Габышева Н. Н. ситиһиилээхтик кыттыбыттара. Үөһээ Бүлүү улууһуттан тахсыбыт "Учитель года Западной Якутии" конкурс билигин “Серебряный пеликан” диэн аатынан киэҥ далааһыннанна уонна кыттааччы ахсаана, географията, ис хоһооно сыллата кэҥээн, тупсан иһэр. Манна кыттыбыт конкурсаннар республиканскай, Бүтүн Россиятааҕы күрэхтэргэ эрэллээхтик кытталлар. Бу улахан проектар олоххо киириилэрэ биһиги улуустан саҕаламмыта улахан силистээх-мутуктаах. М. А. Алексеев аатынан өрөспүүбүлүкэтээҕи гимназия учууталлара 2009 сылтан саҕалаан сылын аайы республикатааҕы "Сыл бастын учуутала" конкурска ситиһиилээхтик кыттан, барыта 7 финалиһы, лауреаты уонна кыайыылааҕы таһаардылар. Маны таһынан, Ороһу, Нам, Харбалаах орто оскуолаларыттан үрдук ситиһиилээхтик кыттыбыттара. “Сыл бастыҥ учуутала” өрөспүүбүлүкэтээҕи кулууп чилиэттэрин көҕүлээһиннэринэн, күрэх кыайыылаахтара маннык күрэхтэргэ бастакы маастар кылаастарын миэстэтигэр кэлэн биэриилэрэ үтүө үгэскэ кубулуйда.

 Сылга биирдэ буолар саамай улахан профессиональнай күрэх үрдүк таһымҥа барыытыгар Д. С. Спиридонов аатынан орто оскуола коллективыгар, чуолаан тэрилтэ салайааччытыгар Кынатов Ю.В. махтанабыт.